Bizim müxalifət mitinqkeçirə bilmir. Düzdür, buna cəhdlər göstərilir, amma alınmır. Nə dərdi-bəladırsa, onlar "azadlıq aşiqi" Nemət Pənahlıdan mitinq keçirməyi qayda-qanununu öyrənməyə çalışmırlar. Nemət bəy istənilən bir aksiyanı ssenariləşdirib, altından da imzasını qoya bilər. Əgər mitinqin təşkilatçılığı ona verilsə. O birilər buna razı olarlarmı? A tövbə, yox. Nədən ki, təşkilatçılar iki gündən bir toplaşırlar, dərdləşirlər, mətbuatda da geninə-boluna təbliğ olunurlar. Belə olan halda, onlar Neməti qabağa buraxarlarmı?
Nemət Pənahlı bilir ki, camaatı mitinqə necə cəlb eləmək olar. Bəyəm 80-ci illərin sonunda camaatı "oturun-durun" deyib, idman elətdirən Nemət bəy deyildimi? Demə, Nemət o vaxtdan mitinq ssenarisi yazmaq üzrə püxtələşibmiş. Kimlər qalmayıbmış ki, Pənahlı onun evində yalvarıb-yaxarmasın. Ki, sən Allah, gəl mitinqdə çıxış elə. Elə Sirus Təbrizlinin ətəyindəki daşları tökdürən də Nemət olub. Məni sevindirən bir məsələ oldu. Yaxşı ki, bəzi partiyalar kimi Nemət Pənahlının başçılıq etdiyi Milli Dövlətçilik Partiyası mitinqə kolonlar qoşulmağın əleyhinə deyil. Öz gücünə-qüvvəsinə arxalanan bütün partiyalar kolon tərəfdarıdırlar.
Müxalifətin sabahkı aksiyasına icazə verildi. Amma verilməsəydi, ondan yaxşıydı. Nədən ki, müxalifətin ürəyi üzüldü bu cavabı alanadək. Bakı şəhər İcra Hakimiyyətindən dünən günün birinci yarısında cavab verməliydilər. Amma meriyadakıların başı qarışıq olduğundan, müxalifətdəkilərdən dönə-dönə üzr istəyiblər ki, bəs sizin cavabınıza günortadan sonra verəcəyik. Müraciətə imza atan partiyalarda da gözləyə-gözləyə qalıblar. Partiyaların qapıları açılanda sıravi üzvdən tutmuş sədrədək hamının diqqəti qapıya yönəlirmiş. Səbrləri tükənən müxalifət elə bilib ki, day meriya onlara cavab verməyəcək. Hazırlaşırmışlar ki, bir bəyanat hazırlasınlar, altından da günün şüarını "mitinq günü çatdı, heç bilmirik neyləyək, meriyadan hələ bir cavab da yoxdur" kimi yazsınlar, görüblər ki, budu ha, poçtalyon əlində məktub gəldi. Meriya bu dəfə də müxalifətin qəlbinə dəymədi, sabahkı aksiyalarına icazə verdi. Müxalifət sevindiyindən günün şüarını da dəyişdi: "Mitinq yerini dəyişmək olmaz".