AZƏRILƏR HƏLƏ DƏ GIROVDUR
Moskvadakı Azərbaycan Sahibkarlar Birliyinin sədri Rüfət Ağayev çeçen yaraqlıların şəhərdəki Diyircəkli Yastıqlar zavodunun sabiq mədəniyyət evində nümayiş olunan "Nord-Ost" müziklinə tamaşa etməyə gələn, amma terrorçuların cənginə düşən 711 nəfərdən bu binada qalmış şəxsləri azad etmək üçün vasitəçiliyə, terrorçularla danışıq aparmağa hazır olduğunu bəyan edib.
Terrorçulara ünvanladığı müraciətində "sizi bütün girovları, o cümlədən qadın və uşaqları azad etməyə çağırıram" deyən Ağayev bildirir: "Bu qədər insana günlərlə əzab vermək vicdanlı və humanist iş deyil. Azərbaycan ərazisində təxminən 20 min nəfər çeçen qaçqını var. Onların hamısı üçün normal yaşam şəraiti yaradılıb. Buradakı terrorçular isə yaxın və uzaq xaricdən olan insanları, o cümlədən Azərbaycanlıları hələ də girov saxlayırlar".
Çeçenlərin girov saxladığı azərilər isə hələ də azad edilməyib.
Dünən aldığımız başqa bir məlumatda isə Moskvada yaşayan azərilərin ciddi yoxlamalara məruz qaldığı bildirilir.
Moskva Şəhər Daxili İşlər İdarəsinin əməkdaşları soydaşlarımızın yaşadıqları hər mənzilə baş çəkərək "pasport rejimini yoxlamaq" adı ilə onları sorğu-suala tutaraq "şübhəli qafqazlılar" haqda müfəssəl bilgilər toplamağa çalışıblar.
Eyni zamanda Moskvada və Rusiyada yeni, daha təhlükəli millətçi tendensiya yaranmaqdadır. Belə ki, bu günlərədək Qafqaz əsillilər Rusiyada "qaralar" və "qafqaz millətinə mənsub şəxs" adlanırdılarsa, dünəndən etibarən rusların şovinist leksikonunda "İslam millətinə mənsub şəxs" kəlməsi peyda olub.